1Jo 4 | KQC | STEP | Nai mokei vava reida vene, vima tau mina rofu mokena vari gira ga aifa, idu vima mina va eru refa rama ina bi Sei rofu ba ide mina, adina ofaofa sei di ago ni okudedi vene bi konori ma sena di vau reyadi.

1 John 4

Rama vima ma ofa vima

1 Nai mokei vava reida vene, vima tau mina rofu mokena vari gira ga aifa, idu vima mina va eru refa rama ina bi Sei rofu ba ide mina, adina ofaofa sei di ago ni okudedi vene bi konori ma sena di vau reyadi. 2 Mina gokai dudu Sei di Vima ya ya diba nigedi: Goina vima yaku Iesu Keriso bi rovaita nufa deyo vo ni okugo bi Sei rofu, 3 Idu goina vima yaku Iesu de ni okugo bi Sei rofu di bi de. Mina vima bi Keriso di ini tuma amiye kaere baido vo nigamadi ma ina gua sena mina konori.

4 Ya, nai midamida, ya bi Sei rofu di vene ma mina vima sena uketo reyadi, adina ina kaere bi ya sa bi isivaga iniye vima kaere bi konori amedo kana de. 5 Ina bi mina kono di mina ye kono di ini mokemoke dudu sina ago rededi mina resi kono vene bi ina neidededi. 6 Una bi Sei rofu di mina resi kaere amiye Sei diba nido bi una neidedo, idu kaere amiye Sei rofu di de bi de una neidedo. Mina bi gokai rama vima ma ofaofa vima vei mama regifa.

Sei bi uka mana amiye

7 Nai mokei vava rena vene, uniyeuniye uka mabinadi, adina uka mana bi Sei rofu dedo. Amiye tau kaere uka mado bi Sei rofu di vata niyo ma ina diba Sei. 8 Ma amiye kaere uka mana de redo bi ina diba de Sei, adina Sei bi uka mana amiye. 9 Mina be gokai uni fogori Sei yaku ini uka mana una oteimaro. Ini Mida yokoimaka mina konori ni feidei deyo, ye ina rofu vegu moigi regifa. 10 Mina bi uka mana: mo una yaku Sei uka mana bi de reyafa, idu ina yaku ini uka una masi ini Mida ni feideyo ye uni vegu no moi koite mago di kana.

11 Nai mokei vava reida vene, Sei yaku ini uka una mana iniye reyo, mina resi una ka uniyeuniye uka mabinadi. 12 Yokoi yaku Sei vena de reyo, idu uniyeuniye uka mabigifa vo nisi bi, Sei bi una sa ideri amedo, ma ini uka mana bi una ideri moi buni redo. ^a

13 Una diba una bi ina ideri amesifa ma ina una ideri, adina ini Vima bi una maro. 14 Ma una bi vesi ni ogau reyafa Baba yaku ini Mida ni feideyo kono di amiye moi vegu riyainedi. 15 Ma kaere amiye yaku ni ogau rego Iesu bi Sei di ini Mida vo nisi bi, Sei bi ina sa amedo ma ina ka Sei sa amedo. 16 Mina ye, una una diba ma mokena vari gira aisifa Sei di uka mana uni rofu di.

Sei bi uka mana amiye ma kaere amiye uka mana ideri amedo bi Sei ideri amedo ma ina ka ina ideri. 17 Mina ida dudu uka mana mina uni veguri rama aido ye kota rego meda okigo ri uka gira moigifa, adina mina konori una ka bi ina kana dada. 18 Uka mana ideri bi ori yokoi de. Uka mana rama iniye yaku ori meki redo, adina ori di obini bi esikaesika. Amiye kaere ori redo bi uka mana ina sa rama ae mona de.

19 Una uka masifa adina ina yaku siko ini uka una maro. 20 Kaere amiye yaku nigo, “Na bi Sei nai uka maida,” idu ini dubuini uka mana de redo bi ofaofa amiye adina kaere amiye yaku ini dubuini uka de mado kaere bi ini nemoko yaku vedo, Sei uka de mago kaere bi de vedo. 21 Ma mina ago gira bi una maro: kaere Sei uka mago bi ini dubuini ka ini uka marainedi.